Die rol van Jahushua

Die vraag oor Jahushua is ʼn vraag wat my reeds ʼn geruime tyd gepla het. Met die besef dat daar nie die sonaanbidding se drie-eenheid of twee-eenheid is nie is die vrae baie duidelik:

1.    Wie en of/wat is Jahushua wat deur sommige as die Messias voorgestel word?

2.    Waar moet hy dan inpas?

 Deur die baie jare het ek oor die saak gedink en gereeld op Sabbat het ons vrae gevra oor kan ons vandag besluit al die verkeerde name moet uit en dan die Hebreeuse name in te sit en die sondag terug te neem na die Sabbat en dan is alles reg?

 In werklikheid is dit die wyse waarop gewerk word. Ek (en andere) het uit verskeie hoeke na alles gekyk. Nie een het iets georkestreer nie maar het uit eie oorweging gaan kyk wat die Skrifte sê aangaande verlossing, gesalfdes, gestuurdes, verwagtinge (deur ons en van ons), en dan finaal wat JHWH direk oor die dinge sê.

 My eie vrae het ek reeds vir die afgelope 4 -5 jaar gehad en ek moes tot een van 2 gevolgtrekkings kom aangaande Jahushua:

 1. Hy is Verlosser en JHWH self (en dus geen mens nie)

    2. Hy was slegs ʼn profeet en ʼn mens soos elkeen van sy tydgenote.

 Om die eerste punt te bewys is baie moeilik en kan slegs gedoen word deur dinge te lees in Tanakh wat nie daar is nie. Deur interpretasie te gee aan JHWH se Woorde om te pas by die doktrine wat ons wil glo.

 Alhoewel ek GROOT vraagtekens oor die Christelike geskrifte plaas, gaan ek nie eens daaraan nou aandag gee nie. Die nodige kom direk uit Tanakh en is voldoende aangesien dit die Skrifte is wat JHWH vir ons daar gestel het om te gebruik.

 Jeshajahu 44:24-28

24 So sê יהוה, jou Verlosser, en Hy wat jou gevorm het van die moederskoot af: “Ek is יהוה wat alles doen, wat alleen die hemel uitspan, en wat die aarde uitsprei sonder iemand by My,

25 wat die tekens van die leuenaars vernietig en die waarsêers mal maak, wat die wyse agteruit laat wyk en hulle kennis dwaasheid maak,

26 wat die woord van Sy dienaar bevestig en die raad van Sy boodskappers voltooi, wat van Jarushalajim sê: “Word bewoon,” en van die stede van Jahuda: “Hulle sal herbou word, en Ek sal sy puinhope oprig,’

27 wat vir die diepte sê: ‘Verdroog! en jou riviere sal Ek laat verdroog,’

28 wat van Koresh sê: ‘Hy is My herder, en hy sal alles voltooi wat My behaag en aan Jarushalajim sê: “Dit moet gebou word,” en aan die tempel, “Die fondamente moet gelê word.”’

Jeshajahu 47:4

4 “Ons Verlosser, Sy Naam is יהוה van die leërskare, die Afgesonderde van Jisra’ěl.

Jeshajahu 48:17-20

17 So sê יהוה, jou Verlosser, die Afgesonderde van Jisra’ěl: “Ek is יהוה jou Elohim, wat jou leer wat voordelig is, wat jou lei op die weg wat jy moet gaan.

18 “Het jy maar na My gebooie geluister het, dan sou jou vrede gewees het soos ʼn rivier en jou geregtigheid soos die golwe van die see.

19 “En jou saad sou soos die sand gewees het, en die wat uit jou liggaam voortkom, soos die korreltjies daarvan. Sy naam sou nie afgesny of verdelg word voor My nie!

20 “Gaan uit Baḇel! Vlug van die Kasdim! Verkondig met jubelende stem, laat dit hoor, stuur dit uit tot by die einde van die aarde! Sê: ‘יהוה het Sy dienaar Jaäkoḇ verlos!’”

Jeshajahu 49:7

7 So sê יהוה, die Verlosser van Jisra’ěl, sy Afgesonderde, aan die diep veragte, aan hom wat ʼn afsku is by die volk, ʼn dienaar van die regeerders: “Konings sal dit sien en opstaan, vorste sal hulle sal hul ook neerbuig ter wille van יהוה wat getrou is, van die Afgesonderde van Jisra’ěl. En Hy het u gekies.”

Jeshajahu 49:26

26 “En Ek sal jou verdrukkers hulle eie vleis laat eet, en van hulle eie bloed sal hulle dronk word soos van mos. Dan sal alle vleis weet dat Ek, יהוה, jou Redder en jou Verlosser is, die Magtige van Jaäkoḇ.”

 Jeshajahu 54:5-8

5 “Want jou Maker is jou Man, יהוה van die leërskare is Sy Naam, en die Afgesonderde van Jisra’ěl is jou Verlosser. Hy word die Elohim van die hele aarde genoem.

6 “Want יהוה  het jou soos ʼn vrou verlate en bedroef in gees geroep, soos ʼn vrou uit die jeugtyd toe sy verag was,” sê jou Elohim.

7 “Vir ʼn klein oomblik het Ek jou verlaat, maar met groot ontferming sal Ek jou vergader.

8 “In ʼn uitstorting van toorn het Ek vir ʼn oomblik My gesig vir jou verberg, maar met ewige goedheid ontferm Ek My oor jou,” sê יהוה, jou Verlosser.

Jeshajahu 63:16-17

16 Want U is ons Vader, selfs al weet Aḇraham nie van ons nie, en herken Jisra’ěl ons nie. U, יהוה, is ons Vader, ons Verlosser – U Naam is van ouds af.

17 יהוה, waarom laat U ons wegdwaal van U weë? Waarom verhard U ons hart, sodat ons U nie vrees nie? Keer terug ter wille van U dienaars, die stamme van U erfdeel!

Jirmejahu 50:33-36

33 So sê יהוה van die leërskare: “Die kinders van Jisra’ěl was verdruk saam met die kinders van Jahuda. En almal wat hulle in ballingskap weggevoer het, het hulle vas gehou. Hulle het geweier om hulle te laat gaan.

34 “Hulle Verlosser is sterk, יהוה van die leërskare is Sy Naam. Hy sal hulle saak sterk verdedig, om die land rus te gee en onrus vir die die inwoners van Baḇel.

35 “ʼn Swaard is oor die Kasdim,” sê יהוה, “en oor die inwoners van Baḇel en oor haar leiers en oor haar wyse mans!

36 “ʼn Swaard is oor die leuenaars, en hulle sal dwaas word! ʼn Swaard is oor haar helde, en hulle sal gebreek word!

Die aanhaling hierbo is seker genoeg al kan daar nog bygevoeg word. Die boodskap is STERK en DUIDELIK dat JHWH en Hy alleen die Verlosser is en NIEMAND anders. Hy gebruik wel van tyd tot tyd mense om daardie verlossingswerk te doen en daardie mense roep Hy en Hy plaas ʼn las en verpligting op die wat Hy geroep het om ʼn boodskap te bring om verlossing te bewerk soos wat ons keer op keer in die Boek van Shof’tim lees. Die mense wat Hy aanstel is nie op verhewe platvorms geplaas nie! Hulle is nie aanbid nie! Hulle is nie aan JHWH of Elohim gelyk gestel nie!

JHWH stel Homself op die voorgrond en sê duidelik dat Hy Sy aansien (Sy Grootheid) met NIEMAND deel nie.

Jeshajahu 42:8

8 “Ek is יהוה, dit is My Naam, en My aansien sal Ek aan geen ander gee, of My lof aan die idole nie.

 Jeshajahu 43:12-14

12 “Ek het verkondig en verlos en dit laat hoor, en daar was geen vreemde eloah tussen julle nie. En julle is My getuies,” sê יהוה, en Ek Ěl.

13 “Ook voor vandag is Ek Hy, en niemand red uit My hand nie. Ek werk, en wie kan dit omkeer?”

14 So sê יהוה, jou Verlosser, die Afgesonderde van Jisra’ěl: “Om julle ontwil sal Ek na Baḇel stuur, en Ek sal hulle almal as vlugtelinge verdruk, selfs die Kasdim, wat oor hulle skepe gejuig het.

Jeshajahu 45:4-7

4 ‘Ter wille van Jaäkoḇ, My dienaar, en Jisra’ěl, My verkorene, roep Ek jou by jou naam, Ek gee jou ʼn naam, hoewel jy My nie geken het nie.

5 ‘Ek is יהוה, en daar is geen ander nie – naas My is daar geen Elohim nie. Ek omgord jou, hoewel jy My nie geken het nie,

6 sodat hulle kan weet van die opgang van die son en van sy ondergang af dat daar buiten My geeneen is nie. Ek is יהוה, en daar is geen ander nie,

7 wat die lig vorm en die duisternis skep, die vrede bewerk en die teëspoed skep. Ek, יהוה, doen dit alles.’

Jeshajahu 45:18

18 Want so sê יהוה, wat die hemele geskep het, Hy is Elohim, wat die aarde gevorm en dit gemaak het, Hy het dit bevestig, Hy het dit nie geskep om woes te wees nie, maar dit gevorm om bewoon te word: “Ek is יהוה, en daar is geen ander nie.

Jeshajahu 45:21-24

21 “Verkondig en bring nader, ja, laat hulle saam raad hou. Wie het dit van ouds af vertel? Lank tevore dit verkondig? Is dit nie Ek, יהוה, nie? En buiten My is daar geen ander elohim nie, ʼn regverdige Ěl en Verlosser, daar is geen naas My nie.

22 “Draai na My en word gered, alle eindes van die aarde! Want Ek is Ěl, en daar is geen ander nie.

23 “Ek het by Myself gesweer, ʼn woord het uit My mond gegaan in geregtigheid en sal nie herroep word nie, sodat voor My elke knie sal buig, elke tong sal sweer.

24 “Hulle sal sê: ‘Alleen in יהוה het ek geregtigheid en krag.’ Na Hom sal hulle kom. En almal sal beskaamd staan wat op Hom toornig is.

Jeshajahu 46:3-10

3 “Luister na My, huis van Jaäkoḇ en die hele oorblyfsel van die huis van Jisra’ěl, wat gedra is van die moederskoot af, opgelig is van geboorte af:

4 en tot die ouderdom toe is Ek Hy, ja, tot die grysheid toe dra Ek! Ek het dit gedoen, en Ek lig julle op, en Ék dra en red.

5 “Met wie wil julle My vergelyk en My net so maak en My gelykstel, dat ons eenders kan wees?

6 “Hulle skud goud uit die geldsak en silwer weeg met die weegskaal af. Hulle huur ʼn goudsmid, en hy maak ʼn ěl daarvan. Hulle kniel neer, hulle buig ook.

7 “Hulle lig hom op die skouer, hulle dra hom en sit hom op sy plek neer. Daar staan hy! Van sy plek beweeg hy nie. Selfs al roep iemand hom, antwoord hy nie. Hy verlos hom nie uit sy benoudheid nie.

8 “Onthou dit en wees mans, draai terug julle harte, afvalliges!

9 “Onthou die dinge wat tevore was, van ouds af, want Ek is Ěl, en daar is geen ander nie, Elohim, en daar is niemand soos Ek nie,

10 wat van die begin af die einde ver-kondig, en van ouds af wat nog nie gedoen is nie, wat sê: ‘My raad sal bestaan, en alles wat My behaag, sal Ek doen,’

Jeshajahu 48:3 en 11

3 “Die vorige dinge het Ek lankal verkondig, en uit My mond het dit gegaan, en Ek het dit laat hoor. Ek het dit skielik gedoen, en dit het gebeur.

...

11 “Om My ontwil, om My ontwil doen Ek dit. Want ag, hoe is dit geskend? En Ek gee My aansien aan geen ander nie.

Om tyd (en plek) te bespaar sal ek die verdere Skrif aanhalings nie neerskryf nie maar aan elkeen oorlaat om self verder ʼn studie te doen. Hierdie is maar slegs uit die Boek Jeshajahu (en nie alles nie) en sluit nie ander boeke in nie.

Ons kan duidelik sien dat JHWH onder GÉÉN omstandighede bereid is om Sy aansien te deel nie. Hy is nie bereid om ʼn tweede of derde persoon toe te laat om te deel in Sy aansien en Sy grootheid nie. JHWH is die een wat verlos, JHWH is die enigste en JHWH is ÉÉN!

D’ḇarim 6:4

4 “Hoor, Jisra’ěl, יהוה ons Elohim, יהוה is een!

Daar is verskeie mense wat sal wil argumenteer dat die Hebreeuse woord ( אחד ) wat met EEN vertaal word hier ook eenheid kan beteken. Die primêre betekenis is egter een en buiten dit het ons uit die mond van JHWH deur Sy profete die onteenseglike verklaring dat Hy een en uniek is, daar is nie nog één nie, daar is nie ʼn ander wat by JHWH gevoeg moet word om Hom ʼn eenheid te maak nie. JHWH is UNIEK daar is géén ander soos Hy nie!

Uit die verskeie Skrifaanhalings soos hierbo gegee is dit vir my uiters duidelik dat Jahushua nie kan wees wat die kerk en andere van hom wil maak nie. Dat hy geleef het as mens en hoogswaarskynlik ʼn verdere profeet van JHWH wat gestuur is om mense te roep om na Hom (JHWH) terug te keer, betwyfel ek nie. Dat hy daarna deur sommiges van sy volgelinge en daarna deur Konstantyn en die Kerk gebruik is om hul eie ryk te skep betwyfel ek ook nie.

Op my twee moontlikhede wie of wat Jahushua is kan ek dus nou die gevolgtrekking maak dat Jahushua nie JHWH of die Verlosser is nie want JHWH self is die Verlosser en Hy is Uniek en daar is géén ander nie.

Die vraag nou of Jahushua die Messias is dan ook duidelik om te antwoord. Hy mag ʼn messias wees soos wat elke profeet, priester en koning ʼn messias is. Hoekom maak ek so ʼn stelling? Wel, dis redelik maklik om te antwoord: messias beteken eenvoudig “gesalfde” en elkeen van die mense hierbo genoem was gewoonlik vir sy taak gesalf.

Om die waarheid te sê, die enigste plek in die hele Boek van Jeshajahu word daar net eenkeer na ʼn messias van JHWH verwys en dit is na Koresh in Jeshajahu 45:1 (“So sê יהוה aan Sy gesalfde, aan Koresh,...)  Dit is verbasend, want Jeshajahu is een van die boeke wat die meeste aangehaal word om te bewys dat Jahushua Die Messias is.

 Sonder om in diepte op die christelike geskrifte in te gaan is dit duidelik dat Jahushua nooit homself met JHWH probeer gelykstel in die eerste drie evangelies nie. Hierdie drie is ook tot ʼn meerdere mate ooreenstemmend met mekaar in meeste van die aanhalings. Die aanhalings van Jahushua is egter nie altyd sonder vraagteken nie en dit kom voor per geleentheid of hy in stryd is met Torah. ʼn Voorbeeld hiervan is die kwessie oor ʼn oog vir ʼn oog en ʼn tand vir ʼn tand waar Jahushua se stelling lynreg teen Torah is wat restitusie gee. Met ander weer blyk dit op dieper insig soos met die geval van die kyk na ʼn (getroude) vrou met begeerte na haar waar die persoon reeds egbreuk gepleeg het.

Dit is dus redelik duidelik dat elke woord in die christelike geskrifte gelees moet word met ʼn sterk onderskraging en kennis van Torah. Daarsonder sal elke leser in ʼn diep gat val wat baie moeilik is om uit te kom.

Die vierde evangelie is in soveel plekke strydig met Tanakh dat dit moeilik is om te glo dat dit dieselfde persoon is waarvan geskryf word. Dis nog moeiliker om te verstaan hoe ‘n ondersteuner van die boek Johannan  enigsins die Torah en Tanakh kan aanvaar. Daar is soveel teenstellings. In die Tanakh is daar SLEGS ÉÉN voorvereiste om gered te word:

Keer terug na JHWH

Om terug te keer na JHWH beteken eenvoudig om Sy Torah (onderrig) en Sy gebooie te aanvaar en te doen. Dit beteken om aan Hom ALLEEN gehoorsaam te wees (en dit sluit onder andere in aan jou ouers, regering en ander gesag bokant jou binne die perke wat die Torah stel).

Na aanleiding van die evangelies met hul foute in is dit duidelik dat Jahushua die pad geloop het soos deur JHWH daar gestel en dat hy sy volgelinge geleer het om JHWH te dien en volg. Is daar dus ʼn verwerping van Jahushua as die Messias? Ja. Is daar verwerping as dat Jahushua ʼn gestuurde en profeet van JHWH was? Beslis nie.

JHWH sê keer op keer: “Keer terug na My!” Nooit sê Hy: “Glo in ‘n verlosser wat homself met My gelykstel,” nie. Nêrens word daar van Sy volk vereis om na iemand anders te draai as Verlosser nie.

Wat betref die profesieë aangaande gesalfdes (messiasse) en verlossers is daar verskeie ander boeke wat gelees kan word, onder andere Restoring Abrahamic Faith deur James Tabor. Die kort deel is dat volgens al die profesieë wat dui op messiasse en die profesieë oor die lydende dienaar, is daar geen aanduiding dat dit wat op Jahushua toegepas kan word nie tensy die Woorde van JHWH gedraai, verdraai en aangepas word om daarby te pas nie.

Eerstens is dit so duidelik soos daglig dat die één messias ook bekend Ben Dawid (seun van Dawid) sal kom om die volk – die hele Jisra’ěl te verenig en terug te bring na die land en dit het NIEMAND van ons nog gesien nie. Dit is allermins wat Jahushua gedoen het. Dit is duidelik uit JHWH se woorde aan Dawid, dat Dawid se koninkryk vir ewig sal staan, hoe JHWH dit ook al sal doen.

2 Sh’mu’el 7:12-16

12 “Wanneer jou dae vol is en jy met jou vaders ontslaap het, sal Ek jou saad wat uit jou liggaam sal voortkom, laat optree en sy koningskap bevestig.

13 “Hy sal vir My Naam ʼn huis bou, en Ek sal sy koninklike troon bevestig tot in ewigheid.

14 “Ek sal sy Vader wees, en hy sal My seun wees. Indien hy verkeerd optree, sal Ek hom straf met ʼn menslike roede en met slae van seuns van Adam.

15 “Maar My guns sal nie van hom wegdraai, soos Ek dit van Sha’ul wat Ek voor jou verwyder het, weggedraai het nie.

16 “En jou huis en jou koningskap sal bestendig wees tot in ewigheid voor jou –  jou troon staan vas tot in ewigheid.”’”

Hier sien ons ook dat JHWH Sh’lomo as Sy seun beskryf. Dawid self beskryf ook homself as JHWH se seun en JHWH as sy Vader (Teh 2:7/89:26). JHWH het nie net een seun nie maar elkeen wat Sy wil doen is Sy seun (of kind), want Hy is ons Vader.

Die enigste ander plek in Jeshajahu waar daar dan ook verwys word na iemand wat gesalf word (dus impliseer dit ʼn gesalfde en word dit nie direk ‘n gesalfde genoem nie) is in Jeshajahu 61:1. Hier het ons weer te doen met ‘n profesie wat nie duidelik op die Dawidiese messias wys nie maar veel eerder na die voorganger wat as Ělijahu uitgewys word in Mal’agi  4:5-6.

Die Dawidiese Messias is inderdaad ‘n mens wat gevul is met die Gees van JHWH. Hy bring die volk van Jisra’ěl terug in die land (Jahuda en die 10 stamme – al twaalf stamme). Hy bring vrede vir die volk. Hy herbou die tempel van JHWH. En buiten dit alles bring hy vrede en geregtigheid vir alle nasies.

Ons het dit nog nie ervaar nie.

Tweedens is dit duidelik dat ʼn messias of gesalfde ook uit die huis van Aharon verwag word. In Zagarja 6:12-13 lees ons die volgende:

12 en praat met hom en sê: ‘So sê יהוה van die leërskare: “Kyk, ʼn man met die naam Spruit, en van sy plek sal hy uit­spruit, en hy sal die Tempel van יהוה bou.

13 “En hy sal die Tempel van יהוה bou. En hy sal aansien hê en op sy troon sit en regeer. En ʼn priester sal op sy troon wees, en die raad van vrede sal tussen hulle twee wees.”’

Net soos JHWH vir Dawid in 2 Sh’mu’el 7 ewige koningskap vir die Huis van Dawid beloof het, het JHWH ook in B’midbar 25 en Sh’mot 29 aan Aharon (deur die lyn van Pineḥas) ewige priesterskap beloof.

B’midbar 25:10-13

10 En יהוה het met Moshe gepraat en gesê:

11 “Pineḥas, die seun van El’asar, die seun van die priester Aharon, het My grimmigheid van die kinders van Jisra’ěl weggedraai omdat hy tussen hulle ywerig was met My ywer, sodat Ek die kinders van Jisra’ěl nie in My ywer verteer het nie.

12 “Daarom sê: ‘Kyk, Ek sluit met hom My vredeverbond,

13 en dit sal vir hom en sy saad na hom die verbond van ewige priesterskap wees, omdat hy vir sy Elohim geywer en versoening vir die kinders van Jisra’ěl gedoen het.’”

Sh’mot 29:9

8 “Ook sy seuns moet jy laat nader kom, en laat hulle die rokke aantrek,

9 en omgord hulle met die gordel, Aharon en sy seuns, en bind vir hulle kopdoeke om, dat hulle die priesteramp kan besit as ʼn ewige wet. So moet jy dan Aharon en sy seuns as priesters aanstel.

Dit is duidelik uit die twee Skrif dele hierbo dat Aharon se priesterlike amp ook ewig is soos Dawid se koningskap. Jirmejahu 33 stel dit weer ook duidelik:

Jirmejahu 33:14-26

14 ‘Kyk, die dae kom,’ sê יהוה, ‘wanneer  Ek die goeie woord wat Ek aangaande die huis van Jisra’ěl en die huis van Jahuda gesê het, tot stand sal bring.

15 ‘In daardie dae en in daardie tyd sal Ek ʼn spruit van geregtigheid vir Dawid laat uitspruit. En hy sal reg en geregtigheid op aarde doen.

16 ‘In daardie dae sal Jahuda verlos word en Jarushalajim veilig woon. En dit sal genoem word: “יהוה ons Geregtigheid.”’

17 “Want so sê יהוה: ‘Vir Dawid sal daar nie ʼn man ontbreek wat op die troon van die huis van Jisra’ěl sit nie.

18 ‘En vir die priesters, die Lěwijim sal daar nie ʼn man ontbreek wat voort-durend brandoffers voor My bring en graanoffers aan die brand steek en slagoffers berei nie.’”

19 En die woord van יהוה het na Jirmejahu gekom en gesê:

20 “So sê יהוה: ‘Indien julle My verbond met die dag en My verbond met die nag kan breek, dat daar geen dag of nag op hulle tyd is nie,

21 dan sal My verbond met Dawid, my dienaar, ook gebreek kan word, dat daar vir hom geen seun sal wees wat regeer op sy troon nie, en met die Lěwijim, die priesters, My dienaars.

22 ‘Soos die leër van die hemele nie getel en die sand van die see nie gemeet kan word nie, so sal Ek die saad van My dienaar Dawid, en die Lěwijim wat My dien, vermeerder.’”

23 En die woord van יהוה het na Jirmejahu gekom en gesê:

24 “Het jy nie opgemerk wat hierdie volk sê nie, wanneer hulle sê: ‘Die twee stamme wat יהוה gekies het, dié het Hy verwerp’? Dus verag hulle My volk, wat nie meer ʼn nasie voor hulle is nie.

25 “So sê יהוה: ‘Indien Ek My verbond met dag en nag, die wette van hemel en aarde, nie vasgestel het nie,

26 dan sal Ek ook die saad van Jaäkoḇ en van My dienaar Dawid verwerp, sodat Ek nie uit sy saad regeerders sal neem oor die saad van Aḇraham, Jitsḥak en Jaäkoḇ nie. Want Ek sal hulle ballingskap ver­ander en My oor hulle ontferm.’”

Dit kan nie duideliker wees nie.

Die gevolgtrekkings wat hieruit gemaak kan word laat ʼn mens wonder hoe dit moontlik was dat jy jou vir soveel jare aan die neus kon laat lei deur die kerk! Want ongeag of jy in die kerk en of jy reeds uit die Kerk (Baḇel) weg is hou die meeste mense nog aan hierdie leerstellings van die Kerk vas al is dit met ander name.

Menige leser sal seker verskeie vrae opper – lesers wat in die kerk sit asook diegene wat hulself as Messiane beskou, maar in werklikheid is albei dieselfde. Dit is nie moontlik om ʼn Ford te verander om ʼn Chev te wees nie al word die naamplaatjie and die wapen vervang.

Wat nodig is, is om van heel voor te begin. Elkeen wat ʼn daadwerklike behoefte het om JHWH te ken en te dien het nodig om terug te gaan na die begin van alle dinge. Daar waar JHWH die werklike riglyne en onderrig gee oor hoe Jisra’ěl moet leef. Dit is dus nodig om alles wat jy voorheen in die kerk geleer het te onleer en om met nuwe oë en met ʼn skoon kop en gedagte Torah te begin leer. Ons vind dan dat Moshe vir die volk sê dat as hulle hierdie Torah sal doen dan sál hulle leef. Om hierdie Torah van JHWH met oorgawe te doen is om JHWH se wil te doen. Om hierdie Torah nie te doen nie is om teen Hom, ons Vader en ons Skepper, en weg van Hom te draai.

Die kern is dat volgens Tanakh, die Skrif soos JHWH dit vir ons gegee het en in die besonder  in Torah is die boodskap baie duidelik:

D’ḇarim 4:1-2

1 nou, luister Jisra’ěl, na die wette en die regsreëlings wat ek julle leer om te doen, sodat julle mag lewe en inkom en die land wat יהוה, die Elohim van julle vaders, aan julle sal gee, in besit mag neem.

2 “Julle mag by die woord wat ek julle beveel, niks byvoeg nie, en julle mag daar niks van weglaat nie, sodat julle die bevele van יהוה julle Elohim mag bewaar, wat ek julle beveel.

Lees gerus die hele hoofstuk van D’ḇarim 4. Die inligting en opdrag soos Moshe dit weergee is baie duidelik sonder enige misverstand. Hy beklemtoon ook in vers 39 dat buiten JHWH daar géén ander is nie.

D’ḇarim 5:33

33 “In al die weë wat יהוה julle Elohim julle beveel het moet julle wandel, sodat julle kan lewe en dit met julle goed kan gaan en julle die dae kan verleng in die land wat julle in besit sal neem.

D’ḇarim 8:1

1 “Verseker dat julle al die bevele wat ek jou vandag be­veel, doen, dat julle mag lewe en vermeerder, en dat julle mag inkom en die land in besit neem wat יהוה aan julle vaders met ʼn eed beloof het.

D’ḇarim 30:6

6 “En יהוה jou Elohim sal jou hart besny en die hart van jou saad, om יהוה jou Elohim lief te hê met jou hele hart en met jou hele wese, sodat jy kan lewe.

Die vers hierbo is nogal interessant want kyk waar is dit geskryf, D’ḇarim 30:6! Dis Tanakh (“Ou Testament” volgens die kerk)! Dis nog erger, dis deel van Torah, die eerste 5 boeke! Maar JHWH sê Hy sal Jisra’ěl se hart besny na hulle fouteer het en verstrooi is en dan sal Hy hulle terugbring na die land. Hulle moet egter eers iets doen voordat vers 6 in werking tree:

D’ḇarim 30:6

2 “En wanneer al hierdie dinge oor jou kom, die seën en die vloek wat ek jou voorgehou het, en jy dit ter harte neem tussen al die nasies waarheen יהוה jou Elohim jou verdryf het,

2 en jy terugdraai na יהוה jou Elohim en na Sy stem luister net soos ek jou van­dag beveel, jy en jou kinders, met jou hele hart en met jou hele wese,

Die volk moet terugdraai na JHWH en na Hom alleen. Daar is nie iemand anders na wie hulle moet draai nie. JHWH self is die enigste. Na JHWH moet gedraai word en na Hom moet geluister word met jou hele hart en jou hele wese. Daar is niemand anders nie.

Jaḥezkěl 20:11

11 “En Ek het hulle My wette gegee en My oordele aan hulle bekend gemaak, sodat die mens dit doen en daarin kan lewe.

Miga 6:8

8 Hy het aan jou bekend gemaak, Adam, wat goed is. En wat vra יהוה van jou anders as om reg te doen en goedheid lief te hê en nederig met jou Elohim te wandel?

In werklikheid is dit ʼn baie goeie gedagte om Torah van voor af te bestudeer. Met ʼn oop gemoed en ontvanglik dat JHWH deur Sy krag jou kan onderrig. Daarna mag dit goed wees om die profetiese boeke te lees vanaf Jeshajahu tot by Mal’agi. Dit sal ʼn goeie fondasie lê om mee te begin. Wanneer Torah en die profetiese boeke goed onder die knie is en jy verstaan wat JHWH vra en jy wil steeds na die christelike geskrifte gaan kyk, sal daar ʼn beter fondasie wees en beter begrip om dit te meet teen die Torah en die Profete.

EK het nie werklik ʼn behoefte om die christelike geskrifte uitmekaar te trek en op die foute te wys nie. Indien die behoefte daar is sal ek wel op ʼn latere stadium dit doen en ook meer vleis aan hierdie dokument te gee.

Ten slotte wil ek net graag die titel vraag beantwoord. Volgens my mening na vele jare se dink, en tob en ondersoek het Jahushua aarde toe gekom om Jahuda en Jisra’ěl te roep om terug te keer na JHWH soos al die ander profete voor hom gedoen het. Hy het ook weens die verdraaiings van die Skrif wat tydens sy leeftyd op aarde was, uitgewys en sy tydgenote geleer om JHWH in waarheid te dien volgens Torah voorskrifte en nie volgens menslike idees (Mondelingse Torah) nie.

Is hy doodgemaak en het hy weer opgestaan? Baie moontlik, maar onbelangrik. Daar is géén Skriftuurlike rede hoekom so iets moes gebeur nie. Daar is geen rede hoekom dit vir ons belangrik moet wees nie. JHWH sê dat hy niks laat gebeur indien Hy dit nie bekend gemaak het nie.

Amos 3:7

7 Want Meester יהוה doen niks tensy Hy sy besluit aan Sy dienaars, die profete, bekend maak nie.

Jahushua het dus na my mening JHWH se volk, sy volkgenote, kom roep om terug te keer na JHWH en om hulle te leer hoe om dit te doen. Niks meer en niks minder nie.