Die Vis

Die vis, so word vertel, is in die vroeë gemeente gebruik as geheime teken om mekaar uit te ken. Dit klink nogal oorspronklik. Die vis vir vissers van mense.

In der waarheid is dit eintlik ‘n leuen. Die vis was wel gebruik as geheime teken, maar deur spioene van die Romeinse regering om gelowiges van J’shua uit te snuffel. Inligting in hierdie verband is in oorvloed in die Vatikaan se katakombes, aldus Dr Alberto Riviera, ‘n voormalige Jesuïtiese priester. Volgens Alberto dui die geskiedenis boeke aan dat die gelowiges dele uit die Skrif kwoteer het en die ander moes dit voltooi. Dit was nadat die Romeinse spioene nie hierdie toets kon slaag nie, dat hulle stelselmatig probeer het om die vis as teken in te bring. Hulle het wel op plekke geslaag en het sodoende verskeie groepe van gelowiges van die gemeente van J’shua uitmekaar laat spat en vervolg.

En die vorste van die Filistyne het vergader om 'n groot offer te bring aan hulle eloah (god) Dagon en om vrolik te wees, en hulle het gesê: "Ons eloah het ons vyand Simson in ons hand gegee."

(Shof [Rig]16:23)

Dagon was die groot vis-god van die die Filistyne asook deur die hele Chaldea. Volgens Alexander Hislop is die Griekse woord ICHTUS (Iesu Chreistus Theou Uios Sôter) gebruik om J’shua gelyk te stel met Dagon om ‘n sekere groep heidene gemaklik te laat voel het. Augustinus het dan ook nog verder gegaan om die suikerpilletjie verder aan te dik en dit as volg verklaar: Iesu Chreistus Theou Uios Sôter, wat beteken in Afrikaans: Jesus Christus Die Seun van God die Verlosser. Soos menigmale al gesê: die sianiedpil bly net so giftig met of sonder die suikeromhulsel. Dit is egter gevaarliker met die omhulsel want dit word so moeilik herkenbaar. Om hierdie vis-storie nog verder te voer het Tertullianus J’shua ons Verlosser, ons Vis genoem. Dit is niks minder as laster nie. Verder is dit duidelik dat Jupiter, ook verteenwoordigend van die songod, die hoof was van die vis of visse in die diereriem (zodiak).

Wat egter ook uit die geskiedenis kom, is dat een van Bacchus se name Die Vis was. Bacchus weer, was maar een van die name waaronder Tammuz, die songod, bekend was.

15“Pas dan terdeë op – want julle het géén verskyning gesien op die dag dat יהוה [JHWH] by Ḥorěḇ uit die vuur met julle gepraat het nie –

16 sodat julle nie verderflik handel deurdat julle vir julle ŉ gesnede beeld, ŉ gelykenis van enige beeld, maak nie: ŉ afbeelding van man of vrou,

17 ŉ afbeelding van enige dier wat op die aarde is, ŉ afbeelding van enige gevleuelde voël wat in die lug vlieg,

18 ŉ afbeelding van enigiets wat op die aarde kruip, ŉ afbeelding van enige vis wat in die water onder die aarde is,

19 dat jy ook jou oë nie na die hemel opslaan, en jy die son sien en die maan en die sterre, die hele leër van die hemel, jou laat verlei en voor hulle neerbuig en hulle dien nie – dinge wat יהוה jou Elohim aan al die volke onder die hele hemel uitgedeel het.

(Deb[Deut] 4:15-19)

Die Skrif hierbo toon duidelik dat ons GEEN afbeelding mag maak om ons Elohim mee te dien nie of om die afbeeldings te aanbid nie. Ons vind ook verskeie ander half-vis half-mens elohim, onder andere: Ea van Babilonië en Oannes by die Grieke, beide soos die eloah Dagon van Filistea.

Om nou werklik die kersie op die koek te sit is die feit dat in Egipte en ander lande, die vis ‘n seksuele en vrugbaarheids betekenis gehad het. Dit verteenwoordig onder andere ook die vroulike geslagsorgaan. Dus kan ons sê dat elkeen wat hierdie vis agter op die motor vertoon, in werklikheid heilige of gewyde vroulike geslagsorgane aan die agterste motoris vertoon. In die nie-verchristelike lande bestaan die betekenis nog steeds. Die vis is gesien as heilig vir die groot vroulike eloah (godin), omdat dit haar reproduktiewe organe verteenwoordig. Die vroulike eloah (godin)? Venus natuurlik. ‘n Vrydag in Italië is Venerdi. Vrydag is ook vernoem na Frija, die Germaanse vroulike eloah (godin) vir Venus. Die Roomse kerk verplig dus ook die eet van vis op ‘n Vrydag om hierdie rede.

In menige nie-verchristelike lande word die vis nog steeds gedra as beskerming teen onvrugbaarheid en die vernuwing van lewe.

AL gevolgtrekking wat ons hiervan kan maak is dat die oproep om uit Babilon te kom ook die vis-plakker agter op die motor insluit. Of dalk is dit ‘n goue hangertjie om die nek. Dit is so dat min mense dit geweet het. Die feit is egter dat die blindheid van die mens deur homself vererger word. Maak jou oë en ore oop. Wees bereid om te LUISTER! Luister en sien wat die Gees van Waarheid ons wil leer. Aanvanklik mag dit moeilik wees, maar die vrede van J’shua sal van jou besit neem en Sy Gees sal aan jou vrede gee

Shalom.

Bronne:

	The Two Babylons – Alexander Hislop
	Gaan uit haar uit, My Volk (Die finale Reformasie) – Dr. CJ Koster
	The Alberto Series - Chick Publications
	Body Guards – Desmond Morris